Eskola-programa

Sarrera

Arlo hau da, zalantzarik gabe, HEZen punturik garrantzitsuenetako bat.

Aurkezten dugun eskola-programa honek hauxe proposatzen die umeei: modu dibertigarrian Erdi Arora irudimenezko bidaia didaktikoa egitea.

Horretarako, beharrezkoak diren tresnak eskaintzen dizkiegu, eurentzat lau programa didaktiko sortuz.

Programa hauek helburu nagusi argia dute: umeek Arratia-Nerbioi eskualdeko Historiaren berri izatea, Ugao-Miraballesko hiribildua abiapuntutzat hartuta, proposatutako ekintzetan parte hartuz.

Izan ere, iraganaren berri izanda, hobeto ulertuko dituzte egungo bizimoduaren oinarriak.

Programak

Gaur egun lau programa didaktiko ditugu, bat Haur Hezkuntzako azken ziklorako eta beste hirurak, Lehen Hezkuntzako ziklo bakoitzarentzat. Gai desberdinak jorratzen dituzte guztiek, Erdi Aroarekin lotuta eta adin bakoitzera egokituta beti.

Programa bakoitza hiru zatitan banatzen da eta atal bakoitzak 45 minutu inguruko iraupena du. Denbora hau laburragoa da Haur Hezkuntzako taldeen kasuan:

• Bisita erakusketara.
• Tailerrak.
• Antzeztutako kanpo-ibilbidea.

H.E.Zak eskaintzen dituen programak hurrengo hauek dira:

Haur Hezkuntzako azken zikloa: Bidaia Erdi Arora.

Lehen Hezkuntzako 1go zikloa: Errege Bidea, merkatarien bidea.

Lehen Hezkuntzako 2. zikloa: Giza antolakuntza eta lanbideak Erdi Aroko hiribilduetan.

Lehen Hezkuntzako 3. zikloa: Burdinoletatik altzairu fabriketara.

Esan bezala, hiribilduko zenbait tokitan egindako ibilbidea antzeztua da, bisita erakargarriagoa eginik.

Programa hauek Arratia-Nerbioi eskualdeko ikastetxeei eskaintzen zaizkie batik bat, baina, interesatuta egonez gero, edonor jar daiteke gurekin harremanetan arazorik gabe.

Eguraldi ona ziurtatzeko asmoz, programak martxotik ekainera garatzen dira. Nahiz eta ostegun eta ostiral goizek (10:00etatik 12:30etara) lehentasuna izan, beste aukera batzuk ere azter daitezke, aldez aurretik hala eskatuz gero.

Zerbitzuak

• Garraiorako dirulaguntza.
• Begirale-zerbitzua.
• Komunak.
• Motxilak uzteko lekua.
• Eguraldi txarra eginez gero, hamaiketakoa Jane jauregian egiteko aukera.